बाँके । बाँकेको नेपालगञ्जबाट करिब पाँच लाख रुपैयाँभन्दा बढी नेपाली नक्कली नोटसहित तीनजना पक्राउ परेका छन् ।

मंगलबार साँझ प्रहरीको विशेष टोलीले नेपालगञ्ज उपमहानगर–२ स्थित न्यूरोडबाट नक्कली नेपाली रुपैयाँ बोकेर हिँडिरहेका उनीहरुलाई पक्राउ गरेको हो ।

बाँकेका प्रहरी नायब उपरीक्षक रामप्रसाद घर्तीका अनुसार पक्राउ पर्नेमा कोहलपुर नगरपालिका–११ का ३३ वर्षीय मोहन कुमाइ, अछामको तुर्माखाँद गाउँपालिका–३ का ३७ वर्षीय दीपक बिसी र सल्यानको वनगाँड कुपेण्डे नगरपालिका–५ का ३० वर्षीय मोहन राना छन्।

उनीहरुको साथबाट प्रहरीले १ हजार दरका नक्कली नोट ५६९ थान बरामद गरेको छ।

रानाका साथबाट ४१८ थान नक्कली नेपाली १ हजारको नोट र कुमाइको साथबाट १५१ थान नेपाली १ हजारको नक्कली नोट बरामद गरिएको छ। उनीहरुमाथि थप अनुसन्धान भइरहेको प्रहरीले जनाएको छ ।