काठमाडौं । माछापोखरी र नयाँबसपार्क क्षेत्रमा यातायात मजदुरहरुले गरेको प्रदर्शनको क्रममा मोबाइल पसलमा लुटपाट भएको छ ।

तीन ठाउँमा आठदेखि १० करोड रुपैयाँ बराबरको लुटपाट भएको नेपाल मोबाइल व्यवसायी संघले दाबी गरेको हो ।

सोमबार बेलुकी ल्होत्से मलमा एक हुल प्रवेश गरी तोडफोड र मोबाइल पसलमा लुटपाट गरेको थियो ।

मोबाइल व्यवसायी संघका अनुसार मोबाइलको स्टोर रुम, पसल र सर्भिस सेन्टरबाट मोबाइल तथा तिनका पार्टपूर्जा लुटपाट भएको छ ।

नेपाल मोबाइल व्यवसायी महासंघका उपाध्यक्ष सोभित प्रसाईंले आन्दोलनको नाममा लुटेराहरूले पसल लुटेको जिकिर गरे ।

सामाजिक सन्जालमा सार्वजनिक भएको सीसीटीभी फुटेजमा मोबाइल पसलको सटर खोलेर लुटपाट गरिरहेको दृष्य देखिन्छ । घटनाबारे अनुसन्धान गरिरहेको प्रहरीले जनाएको छ ।

समयमा नै प्रहरी परिचालन नहुँदा आफूहरूले करोडौँको क्षति व्यहोर्नुपरेको मोबाइल व्यवसायीहरूले दाबी गरे।