सप्तरी । सप्तरीको हनुमाननगर कंकालिनी नगरपालिका-१३ गोबरगाढामा गोली चलेको छ । बुधबार साँझ ३०–४० जनाको समूहमा नेपाल प्रवेश गरेका भारतीय नागरिकले गोली प्रहार गरेका हुन् ।

प्रहरीका अनुसार उनीहरुले ५–६ राउन्ड गोली फायरिङ गरेको बताइएको छ । छर्रा लागेर स्थानीय महेन्द्र पासमान घाइते भएका छन् । उनको घुँडामा छर्रा लागेको छ । मध्य कोसीमा रहेको गोबरगाढाबस्ती भारतीय सीमासित जोडिएको छ ।

सो बस्तीका गाईभैंसी चोरी गरी भारततर्फ लाने गरेकोमा पछिल्लो समय स्थानीय बिन्देश्वर रामको भैँसी चोरी भएको घटनामा स्थानीय बासिन्दाहरुले एक जना भारतीय नागरिकलाई नियन्त्रणमा लिई गोबरगाढामा राखेका थिए ।

ती भारतीय नागरिकलाई छुटाउन ३०–४० जनाको समूहमा आएका भारतीय नागरिकहरुले बस्तीमा फायरिङ गर्दै स्थानीयलाई कुटपिटसमेत गरेको बताइएको छ ।

गोबरगाढामा भारतीयहरु आएर गोली प्रहार गरेको सूचना आएको र त्यसतर्फ नेपाल तथा सशस्त्र प्रहरी परिचालित भइसकेको सशस्त्र प्रहरी बल गण नम्बर ६ राजविराजले जनाएको छ ।