काठमाडौं । टर्कीमा सोमबार गएको भूकम्पमा परी मर्नेको संख्या १२ सय नाघेको छ।  भूकम्पबाट अहिलेसम्म टर्कीमा ९१२ र सिरियामा ३८६ जनाको मृत्यु भएको छ ।

सिरियामा धेरै जसो अलेप्पो, हामा, लाटाकिया र टार्टसका क्षेत्रहरूमा छन्, सिरियाली सरकारी टिभीले रिपोर्ट गरेको छ ।

आधिकारिक रूपमा सिरिया सिभिल डिफेन्स भनेर चिनिने “व्हाइट हेल्मेट“ समूहले पनि उत्तरपश्चिमी सिरियाको विपक्षी नियन्त्रित क्षेत्रमा कम्तीमा १४७ जनाको मृत्यु भएको रिपोर्ट गरेको छ ।

भूकम्पपछि सयौं व्यक्ति घाइते भएका छन् भने अलेप्पो, हामा, लाटाकिया र टार्टसमा ६४८ जना घाइते भएका छन्, सिरियाली सरकारी टिभीले जनाएको छ ।

त्यस्तै टर्कीमा अहिलेसम्म ९१२ जनाको मृत्यु भएको राष्ट्रपति रिसेप एर्दोगानले टेलिभिजन सम्बोधन मार्फत जानकारी दिएका छन् । एर्दोगानले अहिले राहत र उद्धारको कार्य तिब्रगतिमा भइरहेको बताएका छन् ।

भूकम्पमा २ हजार ८ सय १८ भवन भत्किनपुगेका छन्।

टर्कीको दक्षिणपूर्वी क्षेत्रमा पर्ने गाजियान्टेप नजिकै स्थानीय समयअनुसार सोमबार बिहान ४: १७ बजे ७.८ म्याग्निच्युडको भूकम्प गएको अमेरिकी भौगर्भिक सर्भेले जनाएको छ ।