काठमाडौं । सभापति पदमुक्त भएपछि राष्ट्रिय स्वतन्त्र पार्टीको आकस्मिक बैठकले कार्यबाहक सभापतिको जिम्मेवारी डोलप्रसाद अर्याललाई दिने निर्णय गरेको छ ।

बैठकले पार्टीको उपसभापतिसमेत रहेका श्रममन्त्री अर्याललाई पार्टीको कार्यबाहक सभापतिको जिम्मेवारी दिने निर्णय गरेको हो ।

यस्तै उपसभापति डोलप्रसाद अर्यालको अध्यक्षतामा पार्टी कार्यालयमा बसेको आकस्मिक बैठकले अर्याललाई नै दलको नेता बनाउने निर्णय गरेको छ । महामन्त्री तथा प्रवक्ता मुकुल ढकालका अनुसार केन्द्रीय समितिको निर्णय संसदीय दलको आगामी बैठकले अनुमोदन गर्नेछ ।

बैठकमा काठमाडौंमा उपलब्ध केन्द्रीय सदस्य सहभागी थिए भने विराटनगरमा रहेका महामन्त्री ढकाल भर्चुअल सहभागी भएका थिए ।

शुक्रबार संवैधानिक इजलासले रविको सांसद पद कायम नरहने फैसला गरेको थियो । योसँगै लामिछानेले प्रधानमन्त्री पुष्पकमल दाहाललाई राजीनामा बुझाएका छन्। अदालतबाटै पदमुक्त भइसकेको अवस्थामा लामिछानेले राजीनामा बुझाएका हुन्।