मोरङ । उच्च अदालत विराटनगरले जिल्ला कारागार मोरङका चौकीदार गुण्डा नाइके अभिषेक गिरीको रिटमा अन्तरिम आदेश दिन अस्वीकार गरेको छ ।

अदालतका न्यायाधिश रामबहादुर थापा र मिलनकुमार राईको संयुक्त इजलासले गिरीले माग गरे बमोजिमको अन्तरिम आदेश जारी गर्न अस्वीकार गरेका हुन् ।

आफ्नो स्थानान्तरणको निर्णय बदरका लागि अन्तरिम आदेश माग गर्दै कैदी गिरीले उच्च अदालत विराटनगरमा रिट दायर गरेका थिए । अदालतले अन्तरिम आदेश नदिएपछि उनलाई मकवानपुर कारागार कार्यालय भीमफेदी लैजाने बाटो खुलेको छ ।

कारागारका चौकीदारलाई कारागारबाट बाहिर हिँड्न छुट हुन्छ । विराटनगर कारागारमा रहेर बजारमा चन्दा आतंक मच्चाएको गुनासो आएपछि गिरीलाई कारागार व्यवस्था विभागले गत पुस २९ गते सरुवा गर्ने निर्णय भएको थियो ।

कारागार व्यवस्थापन विभागको लिखित निर्देशनसहितको पत्र माघ १ गते विराटनगर आइपुगेको थियो। सोही बमोजिम उनलाई स्थानान्तरण गर्ने प्रक्रिया अघि बढाइएको थियो।

अर्को पनि पढ्नैपर्ने

गुन्डा नाइके अभिषेक गिरीको सरुवाविरुद्ध मोरङ कारागारमा प्रदर्शन

तर, सरुवाको निर्णयका बारेमा अगाडि नै जानकारी पाएका चौकीदार गिरीले निर्णय बदर गर्न माग गर्दै केही कैदीबन्दीलाई उचालेर कारागारमै विरोध प्रर्दशन गरेका थिए।