काठमाडौं । नेकपा एमालेका सांसद कृष्णगोपाल श्रेष्ठले नवनिर्वाचित सभामुख देवराज घिमिरेलाई निष्पक्ष ढंगले सभा सञ्चालन गर्न सुझाव दिएका छन् ।

शनिवार उपसभामुख पदको निर्वाचनका लागि बसेको प्रतिनिधि सभाको बैठकमा बोल्दै सांसद श्रेष्ठले यस्तो लबताएका हुन् । उनले सभामुख र उपसभामुखले आफ्नो गरिमामय पदको सम्मान स्वंय आफैले गर्नुपर्ने बताए ।

उनले भने– ‘त्यो पदको गरिमा यहाँहरुकै भूमिकामा अगाडि बढ्छ । दलीय व्यवस्थामा दल बलियो हुनुपर्छ । तर सभामुख जस्तो गरिमामय पदमा बसेर कसैको दल फुटाउने भूमिका खेल्नु हुँदैन ।

फुट्न लागेको दल छ भनेपनि अहिले भर्खर हाम्रो मतले सभामुख हुनुभएका सम्मानीय सभामुख महोदय त्यस्ता घटना भोलि पनि आउनसक्छ । त्यसमा कुनै राजनीतिक दलको स्वार्थमा सभामुख जानुभयो भने इतिहासमा त्यसलाई कालो रुपमा सम्झनेछौँ ।’

उनले सभामुख राजनीतिक दल फुटाउन लाग्न नहुने सुझावपनि दिए । उनले विगतमा एमाले फुटाउनका लागि सभामुखको नै हात रहेको उल्लेख गर्दै नयाँ निर्वाचित सभामुखबाट त्यस्तो खालको गतिविधि नहुने विश्वास ब्यक्त गरे ।

उनले गरिमामय पदबाट कसैको पार्टी फुटाउने भूमिका र कसैको पार्टीलाई कमजोर बनाउँने खालको भूमिका हुन नहुने बताए ।