एजेन्सी । ओमानलाई हराउँदै इराकले अरेबियन गल्फ कपको उपाधि जितेको छ ।

इराकको बसरा अन्तर्राष्ट्रिय रंगशालामा भएको रोमाञ्चक फाइनलमा ओमानको चुनौती ३-२ ले पन्छाउँदै घरेलु टोलीले उपाधि जितेको हो ।

इराकको जितमा इब्राहिम बायेश, अमजद अत्तवान र मनाफ युनिसले गोल गरे । यस्तै ओमानका लागि सलाह अल-याह्याई र ओमार अल मल्कीले गोल गरे । यो सँगै इराकले चौथो पटक उपाधि जितेको हो ।

यसअघि सन् १९७९, १९८४ र १९८८ मा उपाधि जितेको थियो । ओमानले सन् २००९ र २०१७ मा उपाधि जितेको थियो ।