दाङ । दाङको घोराहीबाट प्रहरीले ब्राउन सुगरसहित दुई जनालाई पक्राउ गरेको छ ।

पक्राउ पर्नेमा भारतको उत्तरप्रदेश जिल्ला बहराइच चकियारोड रुपैडिहाका ५२ वर्षीय समसुल र बाँकेको कोहलपुर नगरपालिका वडा नं. २ का ३६ वर्षीय उमंगबहादुर शाही रहेका छन् ।

जिल्ला प्रहरी कार्यालय दाङका अनुसार तुलसीपुर–घोराही सडकखण्ड अन्तरगत घोराही उपमहानगरपालिका वडा नं. १६ सर्रा चोकबाट उनीहरूलाई मंगलबार दिउँसो गोप्य सूचनाका आधारमा पक्राउ गरिएको थियो ।

उनीहरूको साथबाट ३७ ग्राम २९ मिलिग्राम ब्राउन सुगर बरामद गरिएको छ । यी दुबै जनाले विगतमा पनि ब्राउन सुगरको कारोबार गर्दै आएको प्रहरीको अनुसन्धानबाट खुलेको छ ।

उनीहरु दुबै जनाविरूद्ध लागुऔषधसम्बन्धी मुद्दा चलाएर अनुसन्धान अगाडि बढाएको प्रहरीले जनाएको छ ।