विराटनगर । कोसी अस्पतालमा जीवित एक नवजात शिशुलाई मृत घोषणा गरेपछि डाक्टरमाथि कुटपिट गरिएको छ ।

मोरङ जहदा-३ भातिगञ्जका दीलिप मुखियाको १८ दिनकी शिशुलाई कोसी अस्पतालका डा.अनिल यादवले मृत घोषणा गरेका थिए ।

डाक्टरले मृत्यु भइसकेको भनिएकी शिशुको अहिले गोल्डेन अस्पतालमा एनआइसीयू कक्षमा उपचार भइरहेको छ ।

कोसीमा मृत घोषणा गरेपछि गोल्डेन अस्पतालमा लैजाँदा शिशु जीवित भएको त्यहाँका डाक्टरले बताएपछि आक्रोशित परिवार र आफन्तले डाक्टर यादवमाथि कुटपीट गरेका हुन् ।

श्वासप्रश्वासमा समस्या भएपछि मुखिया परिवारले आज बिहान शिशुलाई उपचारका लागि कोसी अस्पताल ल्याएका थिए । राम्रोसँग परीक्षण नै नगरी यादवले मृत घोषणा गरेको परिवारले जनाएको छ ।

दिलिपकी पत्नी उमाले पुस १७ मा छोरीलाई जन्म दिएकी थिइन् । जन्मताका शिशुको तौल १ किलो ४ सय ग्राम थियो । हस्पिटलमा केही दिनको बसाईपछि डिस्चार्ज गरिएको थियो ।