काठमाडौं । प्रधानमन्त्री पुष्पकमल दाहाल ‘प्रचण्ड’ले योगलाई आत्मसात् गरे मात्र मानिस खुसी हुन सक्ने बताएका छन् ।

आठौँ राष्ट्रिय योग दिवसका आवसरमा भक्तपुरमा आयोजित कार्यक्रमलाई सम्बोधन गर्दै प्रधानमन्त्री प्रचण्डले यस्तो बताएका हुन् । उनले भौतिक विकासले मात्र मानिस जातीको रक्षा गर्न नसक्ने बताए ।

उनले भने,’भौतिक विकासले मात्र मानिस खुसी हुन सक्दैन, भौतिक सँगै आध्यात्मिक र मनोवैज्ञानिक रूपमा सबल हुन सके मात्र जीवन सार्थक बनाउन सकिन्छ ।’

योगको आवश्यकताबारे नेपाल सरकारले शिक्षाका माध्यमबाट जनमानसमा पुर्‍याउने काम गर्ने प्रचण्डले प्रतिबद्धता पनि जनाए ।

पछिल्लो समय विभिन्न किसिमका भाइरसहरूको उत्पत्ति भइरहेको सन्दर्भमा रोगलाई रोक्ने सर्वोत्तम उपाय पनि योग हो भन्ने कुरा भुल्न नहुनेमा उनले जोड दिए ।