काठमाडौं । नेपाली कांग्रेसका वरिष्ठ नेता रामचन्द्र पौडेलले संविधान जोगाउन बनेको गठबन्धन ‘हाइज्याक’ भएपछि ‘करेक्शन’ गर्न प्रधानमन्त्री पुष्पकमल दाहाल प्रचण्डलाई कांग्रेसले विश्वासको मत दिएको बताएका छन् ।

मंगलबार संसद् भवनबाहिर सञ्चारकर्मीसँग कुरा गर्दै वरिष्ठ नेता पौडेलले यस्तो बताएका हुन् ।

उनले दुई वर्षअघि संविधान जोगाउनका लागि बनेको पाँच दलीय गठबन्धन ‘हाइज्याकु भएपछि ‘कोर्स करेक्शन’ का लागि प्रधानमन्त्री प्रचण्डलाई कांग्रेसले विश्वासको मत दिएको बताए ।

संविधानमाथि आइपरेको खतरा बचाउनका लागि समर्थन गरेको उहाँको भनाइ छ ।

उनले भने, ‘संविधान बचाउनका लागि पाँच दलको गठबन्धन भएको थियो । गठबन्धन हाइज्याक भएको थियो । त्यसलाई करेक्शन गर्ने उद्देश्यले पनि मतदान गरेर संविधान बचाएर देशको सङ्कटलाई टार्ने एउटा प्रयास गरेका छौँ । यसले देश, नागरिकको भलो गर्छ ।’