काठमाडौं । विराटनगर सुपर किंग्सले नेपाल टि-२० लिगको दोस्रो क्वालिफायर खेलमा जनकपुर रोयल्सविरुद्ध टस जितेर पहिला ब्याटिङ गर्ने निर्णय लिएको छ ।

टियु क्रिकेट मैदानमा भएको टसमा विराटनगरका कप्तान रोहित पौडेलले टस जितेर पहिला ब्याटिङ गर्ने निर्णय लिएका हुन् ।

जनकपुरको टिम समयमा मैदान नआउँदा खेल आधा घण्टा ढिला गरी सुरु हुन लागेको हो ।

जनकपुर पहिलो क्वालिफायरमा लुम्बिनीसँग ६ रनले पराजित भएको थियो । विराटनगरले भने एलिमिनेटर खेलमा काठमाडौं नाइट्सलाई ९९ रनले हराउँदै दोस्रो क्वालिफायरमा स्थान बनाएको थियो ।

यस खेलको विजेताले बुधबार लुम्बिनीसँग फाइनलमा प्रतिस्पर्धा गर्नेछ ।