एजेन्सी। चीनको रक्षा मन्त्रालयले शनिबार एक अमेरिकी लडाकु विमानले दक्षिण चीन सागरमा अन्तर्राष्ट्रिय कानुनको उल्लंघन गरेको आरोप लगाएको छ।

यो घटना दश दिन अघिको हो । चीनले अमेरिकी लडाकु विमानले चिनियाँ विमानलाई चुनौती दिँदै चिनियाँ पाइलटको ज्यान जोखिममा पारेको बताएको छ ।

यस हप्ताको सुरुमा अमेरिकी सेनाले चिनियाँ नौसेनाको लडाकु विमान अमेरिकी विमानको तीन मिटर भित्रबाट गुज्रिएको बताएको थियो।अमेरिकाले स्थिति टक्करको विन्दुमा पुगेको र अमेरिकी विमानलाई त्यसबाट बच्न बाध्य भएको बताएको थियो।

अमेरिकी पक्षका अनुसार यो घटना पारसेल टापु नजिकैको विवादित क्षेत्रमा भएको हो ।

चिनियाँ प्रवक्ताले अमेरिकाले यस घटनाको जानकारी दिएर अन्तर्राष्ट्रिय समुदायलाई भ्रमित गरेको बताएका छन् ।

बिबिसीका अनुसार चीन, ताइवान र भियतनामले पारासेल टापुहरू वरपरको पानीमा आफ्नो अधिकार दाबी गर्छन्।