कैलाली । नेकपा (माओवादी केन्द्र) लाई सुदूरपश्चिम प्रदेशसभा संसदीय दलको नेता चयन गर्न सकस परेको छ । संसदीय दलको नेतामा दुई जनाले दाबी नछाडेपछि संसदीय दलको नेता चयन गर्न सकस परेको हो ।

दलको नेता चयनका लागि शनिवार दिउँसो संसदीय दलको बैठक बसेको थियो । संसदीय दलको कार्यालयमा करिब ३ घण्टा चलेको बैठकमा सहमति नजुटेको बताइएको छ । संसदीय दलको नेतामा दुई जना आकांक्षी देखिएका छन् ।

स्थायी कमिटी सदस्य तथा सुदूरपश्चिम इन्चार्ज खगराज भट्ट र केन्द्रीय सदस्य ओमविक्रम भाटले संसदीय दलको नेतामा दाबी गरेका छन् । भट्ट र भाटको बिचमा मात्र पनि छलफल भएको थियो।

सुदूरपशिममा माओवादीका ११ जना प्रदेश सभा सदस्य छन् । शनिवार सहमति नजुटेपछि आइतवार बिहान ९ बजे पुनः बैठक बस्ने बताइएको छ ।