चितवन । प्रधानमन्त्री पुष्पकमल दाहाल ‘प्रचण्ड’ले आफ्नो यो कार्यकालमा भाषण कम गर्ने बताएका छन्।

चितवनको भरतपुर महानगरपालिका-१० स्थित नारायणी नमुना माध्यामिक विद्यालयको उद्घाटन गर्दै प्रधानमन्त्री प्रचण्डले भाषण कम काम धेरै गर्ने बताएका हुन्।

उनले भने ,‘मैले बाँकी जीवन सुशासन र विकासकालागि समर्पित गर्ने भनेको छु । म अहिले धेरै भाषण गर्ने मनस्थितिमा छैन यो कार्यकाल । म भाषण कम काम धेरै र जनताको सेवा धेरै गरेर प्रस्तुत हुने प्रतिज्ञा गरेको छु ।’

उनले अहिले सुशासन र विकासको पक्षमा काम गर्दै नेपाली जनताको आवश्यकतालाई सम्बोधन गर्दै जाने प्रतिबद्धता पनि व्यक्त गरे।

उनले आफ्नो शपथ ग्रहणपछि बसेको क्याबिनेटको निर्णयले पनि अर्थतन्त्रको सुधार र जनताले पाउँदै आएको सास्तीबाट मुक्त गर्ने बताए।प्रधानमन्त्री प्रचण्डले हरेक दिन सुशासन र विकासको पक्षमा केही न केही काम गर्दै जाने प्रतिवद्धता गरेको पनि बताए ।