मकवानपुर । मकवानपुरमा बालकको हत्या गरेको आरोपमा एकजना पक्राउ परेका छन् । पक्राउ पर्नेमा हेटौंडा-१६ बाबेडाँडाका ३८ वर्षीय आइत सिं भोम्जन रहेका छन् ।

भोम्जनलाई बालकको हत्यामा संलग्न भएको भन्दै जिल्ला प्रहरी कार्यालय मकवानपुरले पक्राउ गरि सार्वजनिक गरेको हो । गत सोमबार हेटौंडा उपमहानगरपालिक वडा नम्बर-१६ मा हात बाधेर रुखमा झुण्डिएको अवस्थामा मृत फेला परेका थियो ।

भोम्जन सोही स्थानका मेघ बहादुर थिङका १२ वर्षीय छोरा मुस्कान भनिने सुजन थिङको हत्यामा संलग्न रहेको प्रहरी अनुसन्धानमा खुल्न आएको जिल्ला प्रहरी कार्यालय मकवानपुरले जनाएको छ ।

बालक घरबाट हराएको भन्दै खोजतलास गर्ने क्रममा आइतबार बिहान घरबाट अन्दाजी ३ सय मिटर पर जरुङ्गे सामुदायिक वनमा दुवै हात बाँधिएको अवस्थामा क्यामुनाको रुखमा झुण्डिएको अवस्थामा फेला परेका थिए । भोम्जनमाथि थप अनुसन्धान भइरहेको प्रहरीले जनाएको छ ।