एजेन्सी । आन्ध्र प्रदेशको नेल्लोर जिल्लामा राज्यका पूर्वमुख्यमन्त्री चन्द्रबाबु नायडुको राजनीतिक अभियानका क्रममा भागदौड मच्चिँदा आठ जनाको मृत्यु भएको छ ।

हाल राज्य विधानसभामा विपक्षी नेता नायडु कन्दुकुर शहरको एक सभालाई सम्बोधन गर्ने कार्यक्रम थियो । बुधबार साँझमा नायडुको गाडि उक्त क्षेत्रबाट गुडिरहेका बेला भीड सुरु भएको थियो ।

जम्मा भएको ठूलो भीड नेतालाई भेट्न अगाडि बढ्ने क्रममा भागदौड मच्चिएको थियो । उक्त भागदौडमा कैयौं घाइते भएको र केहीको अवस्था गम्भिर रहेको बताइएको छ ।

नायडूले रोड शो गरिरहेका बेला उनको गाडीनजिकै हजारौंको संख्यामा समर्थकहरुको भीड जम्मा भएर भागदौड सुरु भएको थियो । पार्टीले मृतकका परिवारलाई १० लाख भारतीय रुपयाँ आर्थिक सहायता दिने घोषणा गरेको छ।