काठमाडौं । माघ २० गते प्रदर्शन तयारीमा रहेको फिल्म ‘ह्यारीकी प्यारी’को मोसन पोस्टर सार्वजनिक भएको छ ।

सोसल-कमेडी जनरामा निर्माण भएको फिल्मको मोसन पोस्टरमा ब्रिफकेस समातेर डलर कमाउन दौडिएको ह्यारी र उसलाई पछ्याइरहेकी प्रेमिकालाई चित्रण गरिएको छ ।

पर्वतमा छायांकन गरिएको फिल्ममा साम्राज्ञी गाउँले युवतीको भूमिकामा प्रस्तुत भएकी छन् । चलचित्रमा जितु ह्यारी र साम्राज्ञी उनको प्यारीका रुपमा देखिनेछन् । यो फिल्म साम्राज्ञीको पहिलो कमेडी फिल्म समेत हो ।

चिकित्सक समेत रहेका रिजालको डेब्यु निर्देशन रहेको यो फिल्मलाई भारतको मुम्बईस्थित प्राइम फोकन स्टुडियोमा सम्पादन गरिएको जनाइएको छ ।

कपिल रिजालको लेखन तथा निर्देशन रहेको फिल्म माघ २० गते प्रदर्शन हुँदैछ । चलचित्रमा जितु नेपाल र साम्राज्ञी राज्य लक्ष्मी शाह शिर्ष भूमिकामा छन् ।

जितु र साम्राज्ञीका साथमा विजय बराल, लक्ष्मी गिरी, सुवास गजुरेल, नरेश पौडेल, रञ्जना भट्टराई, समिक्षा पौडेल, रमेश अधिकारी, डिल्लीराम खनाललगायतका कलाकारले यसमा अभिनय गरेका छन् ।