काठमाडौं । प्रधानमन्त्री शेरबहादुर देउवाले स्थानीय तह विकास निर्माणको आधार स्तम्भ बन्नुपर्ने बताएका छन्।

ललितपुर महानगरपालिकाको १०४ औं स्थापना दिवसको अवसरमा शनिबार आयोजित कार्यक्रममा बोल्दै प्रधानमन्त्री देउवाले यस्तो बताएका हुन् ।

प्रधानमन्त्री देउवाले भने, ‘संविधानले स्थानीय तहलाई विकास निर्माणको आधार स्तम्भ हो । यहाँका जनप्रतिनिधिले नमूना नगरको रुपमा विकास गर्ने भूमिका खेल्नुहुनेछ भन्ने विश्वास लिएको छु । महानगरपालिका भित्र राष्ट्रिय गौरवका धरोहर छन्। यिनीहरूको संरक्षण जरुरी छ ।’

स्थानीय तहको काम कारबाही जनमुखी, पारदर्शी र नागरिकप्रति जवाफदेही हुनुपर्ने बताए। नेपालको संविधानले स्थानीय तहलाई विकास, निर्माण र जनसेवाको आधार स्तम्भको रुपमा महत्वपूर्ण अधिकार र जिम्मेवारी प्रदान गरेको देउवाको भनाइ छ।

देउवाले सर्वसाधारणको नजिकको सरकार भएकाले पनि स्थानीय तहको कामकारबाही नागरिकप्रति नै बढी जिम्मेवा, परिणाममुखी र जवाफदेही हुनुपर्ने बताए ।