एजेन्सी । पाकिस्तान र अफगानिस्तान सीमामा गोली हानाहान भएको छ । पाकिस्तानी अधिकारीकाअनुसार दुवै देशको बीच सीमामा तालिवानी जवानले गोली चलाएका हुन् ।

गोली लागेर एक जनाको मृत्यु भएको छ । दुई जना घाइते भएका छन् । अफगान सैनिक दक्षिणपश्चिममा रहेको चमन बोर्डर नजिक असैनिक इलाकामा गोली चलाएका थिए । सोपछि सीमा क्षेत्रमा रहेको केही गाउँ उनीहरुले खाली गराएका थिए ।

सञ्चारमाध्यमका अनुसार त्यहाँका अस्पताल र क्षेत्रलाई सचेत गराउने काम भएको छ । यसअघि पाकिस्तान र अफगान सैनिकबीच भएको झडपमा ६ जनाको ज्यान गएको थियो ।

तालिवान सैनिकले पहिले पाकिस्तानी सैनिक जवानले गोली चलाएको बताएको छ । समस्या समाधानका लागि दुवै पक्षबीच वार्ताका पहल भइरहेको बताइएको छ ।