काठमाडौं । प्रमुख निर्वाचन आयुक्त दिनेशकुमार थपलियाले एउटा दलको अध्यक्ष अर्को दलबाट सांसद बन्न पाउने वा नपाउने विषयमा कानुनी प्रष्टता नभएको बताएका छन् ।

आयोगले बुधबार गरेको पत्रकार सम्मेलनमा बोल्दै प्रमुख आयुक्त थपलियाले यस्तो बताएका हुन् । उनले यस्तो विषय सम्बन्धित व्यक्तिको नैतिकतासँग जोडिने बताए ।

नेपाल परिवार दलका अध्यक्ष एकनाथ ढकाल समानुपातिक निर्वाचन पद्धतिबाट नेकपा एमालेको सांसद निर्वाचित भएका छन् ।

प्रमुख आयुक्त थपलियाले भने, ‘एउटा दलको अध्यक्ष अर्को दलको निर्वाचन चिह्न लिएर चुनाव लड्न र समानुपातिक तर्फबाट निर्वाचित हुन पाउँछ कि पाउँदैन भन्ने विषयमा कानुनमा प्रष्ट छैन, यो नैतिकतासँग जोडिएको विषय हो ।’

तथापि, यो विषय आगामी दिनका लागि छलफलको विषय बनेको उनले बताए ।