काठमाडौं । महानगरीय अपराध महाशाखाले पोर्चुगल पठाईदिन्छु भन्दै ठगी गर्ने एक महिलालाई पक्राउ गरेको छ ।

पक्राउ पर्नेमा सर्लाही हरिपुर नगरपालिका १ घर भई काठमाडौं ३२ तिनकुने बस्ने ३० वर्षिय धन कुमारी ओली रहेकी छन् ।

उनले विभिन्न व्यक्तिहरूलाई वैदेशिक रोजगारको लागि पोर्चुगल पठाईदिन्छु भनि विश्वास दिलाई राहदानी समेत लिई २१ लाख रूपैयाँसमेत लिएकी थिईन ।

पक्राउ परेकी ओलीले आफ्नो बैंक खातामा रकम जम्मा गर्न लगाई अफर लेटर, भिषा लगायतका कागजातहरु नक्कली बनाई ठगी गरेको पीडितहरुको उजुरीको आधारमा ओलीलाई नियन्त्रणमा लिइएको महाशाखाले जनाएको छ ।

उनलाई ललितपुर सातदोबाटोबाट पक्राउ गरीएको हो । थप अनुसन्धान भइरहेको महाशाखाले जनाएको छ।