काठमाडौं । ललितपुरको फुल्चोकीको जङ्गलमा हराएका चार जना विद्यार्थी फेला परेका छन्। जिल्ला प्रहरी परिसर ललितपुरको टोलीले ११ घण्टापछि उनीहरूलाई उद्धार गर्न सफल भएको हो।

नेपाल राष्ट्रिय निर्माण मावि मुलपानीमा कक्षा ११ र १२ का अध्यायरत ४ जना विद्यार्थी हराएका थिए।

शनिवार बिहान १२५ विद्यार्थी तथा ९ जना शिक्षकहरू बिहान फुलचोकीमा घुमेर दिउँसो २ बजे फर्कने क्रममा हराएका थिए।

शिक्षक र विद्यार्थीहरूले मिलेर खोज्दा पनि फेला नपरेपछि शनिबार साँझ करिब ७ बजेतिर उनीहरूले प्रहरी प्रभाग बाडेगाउँमा खबर गरेका थिए।

खबर पाएपछि प्रहरी निरीक्षकसहित खटिएको २० जनाको टोलीले मध्यराति १ बजे उनीहरूलाई फेला पारेको परिसरले जनाएको छ। उनीहरूलाई फेला पारेर शिक्षकको जिम्मा लगाएको प्रहरीले जनाएको छ।