काठमाडौं । अमेरिकाबाट पार्सलमा नेपाल पठाइएको १० किलो ३ सय ग्राम गाँजा प्रहरीले काठमाडौंबाट बरामद गरेको छ ।

बच्चाहरुको सोफा र वाटर डिस्पेन्सरको पार्सलमा लुकाएर पठाएको गाँजा प्रहरीले बरामद गरेको हो । साथै गाँजा रिसिभ गर्ने दुईजनालाई पनि प्रहरीले नियन्त्रणमा लिएको छ ।

पक्राउ पर्नेमा सल्यान घर भएका ३४ वर्षीय बीर बहादुर बुढाथोकी र भारतिय नागरिक २५ वर्षीय राजा कुमार छन् । लागुऔषध नियन्त्रण ब्यूरोका एसपी योगेन्द्र कुमार खड्काका अनुसार सो गाँजा नक्सालस्थित सांग्रिला टुर्स प्रालिको कार्यालयबाट बरामद गरिएको हो ।

बच्चाहरुको सोफा र वाटर डिस्पेन्सरको पार्सलमा लुकाएर पठाएको गाँजा बरामद गरिएको उनले बताए । प्रहरीको अनुसन्धानमा विमानस्थलबाट सो गाँजा भारतीय नागरिकले भारत लैजान लागेको खुलेको छ ।