काठमाडौं । गोप्य सूचनाको आधारमा प्रहरीले हुण्डी कारोबारमा संलग्न तीन जनालाई पक्राउ गरेको छ ।

पक्राउ पर्नेमा नयाँ दिल्ली घर भई ठमेल बस्ने ५० वर्षीय कमलकान्त कुल्थिया, सप्तरी घर भई नक्साल बस्ने ६७ वर्षीय निर्मलकुमार अग्रवाल र राजस्थान घर भई ताहाचल बस्ने ५५ वर्षीय किशन गोपाल छन्।

काठमाडौं उपत्यका अपराध अनुसन्धान कार्यालयबाट खटिएकको टोलीले बिशालबाजार स्थित अनुज सेन्टर र न्युरोड खिचापोखरी स्थित जय दुर्गा ट्रेड ईन्टरनेशनलबाट तीनै जनालाई पक्राउ गरेको हो ।

प्रहरीले उनिहरुको साथबाट ३१ लाख ८१ हजार ३८५ नगद र विभिन्न व्यक्ति तथा संस्थाको नाममा काटिएको चेक बरामद गरेको छ ।

पक्राउ परेका तीनै जनालाई नेपाल राष्ट्र बैंक ऐन २०५८ बमोजिम आवश्यक कानुनी कारवाहीको लागि जिल्ला प्रहरी परिसर टेकु पठाईएको प्रहरीले जनाएको छ ।