एजेन्सी । बेलायतको सत्तारूढ दल कन्जर्भेटिभका नेता ऋषि सुनक देशको प्रधानमन्त्री बन्ने सम्भावना बढेको छ ।

प्रधानमन्त्री पदको दौडमा रहेका बोरिस जोनसनले मैदान छोडेपछि सुनकलाई चुनौती दिने पेन्नी मोर्डन्ट मात्र हुन् ।

तर प्रधानमन्त्री पदमा लड्नका लागि आवश्यक १०० सांसदको समर्थन मोर्डन्टले पाउने खासै सम्भावना देखिएको छैन । अहिलेसम्म जम्मा २० सांसदले उनलाई समर्थन गरेका छन् ।

बेलायती समयअनुसार अपराह्न २ बजेसम्म मोर्डन्टले १०० सांसदको समर्थन हासिल गरिसक्नुपर्नेछ । आइतवार बिहान प्रधानमन्त्री पदका लागि औपचारिक अभियान थालेका सुनकसँग १५० भन्दा बढी सांसदको समर्थन छ ।

अनि जोनसन दौडबाट बाहिरिएपछि सुनकको पक्षमा थप सांसदहरू खुलेका छन् । १०० सांसदको समर्थन पाउने एक मात्र उम्मेदवार सिधै प्रधानमन्त्री बन्न पाउँछ ।