काठमाडौं। नेपाल प्रहरीमा अहिले दुई अतिरिक्त प्रहरी महानिरीक्षक (एआईजी) पद रिक्त छ । कार्तिक १५ गते एआईजी अरुण विसी र कार्तिक २५ गते एआईजी रविन्द्र धानुकले ५६ वर्षे उमेरहदका कारण अनिवार्य अवकाश पाउँदैछन् । योसँगै प्रहरीमा चार एआईजी पद रिक्त हुनेछ ।

साउन २० मा एआईजी विश्वराज पोखरेल र २३ भदौमा एआईजी मुकुन्द आचार्यले ५६ वर्षे उमेर हदकै कारण अवकाश पाउँदा दुई पद रिक्त भएको दुई महिना नाघिसकेको छ । तर, आईजीपी धिरजप्रताप सिंहले भने एआईजी बढुवामा चासो नै नराखेको प्रहरी स्रोत बताउँछ ।

आईजीपी सिंहले एआईजी बढुवा भन्दा पनि ३० वर्षे सेवा अवधि हटाउन बालुवाटारमा विचौलियाहरुलाई खटाएको हुँदा निर्वाचन अघि बढुवाको सम्भावना नदेखिएको एक उच्च प्रहरी अधिकारीले बताए । प्रहरीको बढुवा र खरिदमा अहिले विचौलिया ठेकेदार दिपक भट्ट, राजमान मिश्रदेखि रामचन्द्र भट्टसम्मले चलखेल गर्दै आइरहेका छन् ।

दिपक भट्ट अहिले पनि प्रहरीको एफपीयू मिसनका लागि आवश्यक बन्दोबस्तीका सामानको खरिदमा चलखेल गरिरहेका छन् । प्रहरीले मिसनका लागि खरिद गर्ने आवश्यक हतियारदेखि बुलेटप्रुफ गाडीसम्मको ठेक्कामा उनै भट्टहरु चलखेलमा लागिरहेका छन् ।

उनीहरूले प्रधानमन्त्री शेरबहादुर देउवा पत्नी आरजु राणा र भुषण राणाको नाममा खरिददेखि सरुवा बढुवासम्म चलखेल गर्दै आइरहेका छन् ।

बालुवाटार ठेकेदाहरुकै कब्जामा रहेका कारण प्रहरी अधिकारीहरु उनै ठेकेदारसामु लम्पसार पर्दै आएका छन् । केही डिआईजी त ठेकेदारकै भरमा बढुवा हुन खोजिरहेका छन् ।

निर्वाचन आयोगले आचारसंहिता लागू गरेपनि विशेष कारण देखाउँदै सरकारले निर्वाचन आयोगसँग सहमति लिएको खण्डमा भने बढुवा हुन सक्छ । शसस्त्र प्रहरीमा पनि मंगलबार मात्र बंशी दाहाल एआईजीमा बढुवा भएका थिए ।

प्रधानमन्त्री शेरबहादुर देउवा नेतृत्वको सरकार निर्वाचनअघि नै चार एआईजी नियुक्तिको पक्षमा रहे पनि ठेकेदारहरुको चलखेल र आईजीपीकै उदासिनताका कारण बढुवा हुने अवस्था देखिदैन ।

अर्को पनि पढ्नैपर्ने

प्रहरीभित्र रोकिएन भ्रष्टाचार ,अख्तियारले १५ करोड बढीको खरिद सम्बन्धी फाइल झिकायो

यता, एआईजी बढुवाको प्रमुख दाबेदारमा डिआईजीहरू बसन्त कुँवर, अशोक सिंह, टेकप्रसाद राई, दीपक थापा, श्याम ज्ञवाली, किरण बज्राचार्य, उमेशराज जोशी, सन्दीप भण्डारी, मिरा चौधरी, भिम ढकाल, रामदत्त जोशी लगायत छन् ।

पहिलो नम्बरमा एआइजीमा बढुवा हुने नै सिंहको अवकाशपछि आउँदो चैतमा आईजीपी हुन सहज हुने भएकाले बढुवामा डिआईजीहरूको चलखेल बढेको छ । निर्वाचन नजिकिदै गइरहेको समयमा ठेकेदार भट्ट र विचौलिया रामचन्द्रले मोलमोलाई सुरु गरिसकेको स्रोतको दावी छ ।

प्रहरी नियमावली २०७१ को परिच्छेद–४ को नियम ९ (१) को खण्ड (६) मा ‘प्रहरी निरीक्षकभन्दा माथिका पदहरू शतप्रतिशत बढुवाद्वारा पूर्ति गरिनेछ । नियम ९ बमोजिम प्रतिशत निर्धारण भई बढुवाद्वारा पदपूर्ति गर्न लेखी आएको मितिले तीन महिनाभित्र बढुवा समितिले पदपूर्ति गरिसक्नुपर्नेछ ।’ उल्लेख छ । तर, एआईजी पद रिक्त भएको तीन महिना पुग्न लाग्दा पनि बढुवा प्रक्रिया अझै सुरु हुन सकेको छैन ।

त्यसो त अख्तियार दुरुपयोग अनुसन्धान आयोगले कोयर म्याट्रेस र जुत्ता खरिदको घोटलामा प्रहरी प्रधान कार्यालयलाई पत्र नै पठाएर अनुसन्धान गरिरहेको छ । १५ करोड बढी खरिदको फाइल झिकाएर अख्तियारले छानविन थालेसँगै हेडक्वार्टरमा हंगामा मच्चिएको छ ।