काठमाडौं । गृहमन्त्री बालकृष्ण खाँणले नागरिकता विधेयकलाई रोक्ने राष्ट्रपतिको कदम असंवैधानिक भएको बताएका छन् । मंगलबार काठमाडौंमा आयोजित गैरआवासीय नेपाली संघको वार्षिक साधारणसभामा बोल्दै गृहमन्त्री खाँणले यस्तो बताएका हुन् ।

उनले राष्ट्रपति विद्या भण्डारीले संविधानविपरीत गएर नागरिकता विधेयक प्रमाणीकरण नगरेका कारण गैरआवासीय नेपालीहरुलाई पनि नागरिकता दिने संवैधानिक व्यवस्था कार्यान्वयन गर्न नसकिएको उल्लेख गरे ।

राष्ट्रपतिको सो गैरसंवैधानिक कामको विरोध गरेर सो नागरिकता विधेयक प्रमाणीकरणका लागि दबाब दिन पनि गैरआवासीय नेपालीहरुलाई उनले अनुरोध गरे ।

उनले नागरिकताविहीन नेपाली नागरिकहरुलाई नागरिकता दिन संविधान संशोधन गर्नुपर्ने भएकाले सत्तारुढ गठबन्धनलाई दुईतिहाइ बहुमत आवश्यक रहेको बताए ।

आगामी मंसिर ४ गते हुने प्रतिनिधिसभा र प्रदेशसभा निर्वाचनमा सत्तारुढ गठबन्धनलाई दुईतिहाइ बहुमत दिन उनले आममतदातालाई आग्रह गरे ।