पर्सा । नेकपा एमाले र जनता समाजवादी पार्टी (जसपा)को गठबन्धनले पर्सामा स्वतन्त्र उम्मेदवारी दिएका नेताहरुलाई उम्मेदवारी फिर्ता लिन आग्रह गरेको छ ।। पार्टीबाट टिकट नपाएको रिसमा स्वतन्त्र उम्मेदवारी दिएका नेताहरुलाई उम्मेदवारी फिर्ता लिन आग्रह गरेको हो ।

स्वतन्त्र उम्मेदवारी दिएका जुनसुकै नेताले निर्वाचन आयोगले तोकेको समयभित्र उम्मेदवारी फिर्ता नलिए कारवाही गर्ने चेतावनी समेत गठबन्धनले दिएको छ ।

सोमबार वीरगञ्जमा बसेको एमाले-जसपा गठबन्धनको बैठकले पार्टीबाट वागी भई उम्मेदवारी दिनेहरुलाई आ(आफ्नो उम्मेदवारी फिर्ता लिन लगाउने र नलिए कारवाही गर्ने निर्णय गरेको हो ।

जसपा नेता करिमा बेगमले पर्सा-२ ‘ख’, जन्नत अन्सारीले-१ ‘क’ मा स्वतन्त्र उम्मेदवारी दिएका छन् । त्यस्तै रुपेशमान सिंह, मुकेश द्विवेदीलगायतले पनि स्वतन्त्र उम्मेदवारी दिएका छन् ।

निर्वाचन अधिकृतको कार्यालयले उम्मेदवारको सूची सार्वजनिक नगरेकाले बागी उम्मेदवारी दिनेहरुको संख्या यकिन हुन सकेको छैन । बैठकले गठबन्धनका संयुक्त उम्मेदवारलाई जिताउन १२ सदस्यीय निर्देशन समिति समेत गठन गरेको छ ।