काठमाडौं । निलम्बित प्रधानन्यायाधीश चोलेन्द्रशमशेर जबराले महाभियोग सिफारिस समितिमा दिएको अडियो भिडियो बयानको उतार पुनः पढेर सुनाएपछिमात्रै हस्ताक्षर गर्ने बताएपछि सोही अनुसार हस्ताक्षरको क्रम चलिरहेको छ ।

सिफारिस समितिमा जबराले भदौ १५ देखि २८ गतेसम्म दिएको बयानलाई समितिले उतारेको थियो । सोही उतार (भर्बेटम) पत्रमा राणाले हस्ताक्षर गरेका हुन् ।

बिहान नौ बजेदेखि बसेको समितिको बैठकमा कागजमा उतारिएको बयान आफूले सुनेरमात्रै हस्ताक्षर गर्ने अडान राखेपछि प्रत्येक पेज पढ्दै सुनाएपछि मात्रै हस्ताक्षर गर्दा ढिलाइ भएको हो ।

संसद्को कार्यकाल भोलि असोज १ गते राति १२ बजेसम्म रहने भएकाले महाभियोग टुंग्याउन समितिलाई समय कम छ । तर समितिले समयभित्रै प्रतिवेदन बनाएर संसदमा पेश गर्ने जनाउँदै आएको छ ।

भोलि संसद्को अन्तिम बैठक राखेर चोलेन्द्रमाथिको महाभियोग टुंगोमा पुर्‍याउने संसद् सचिवालयको तयारी छ ।​