काठमाडौं । चिनियाँ जनकंग्रेस अध्यक्ष ली चान्सु हाल चारदिने औपचारिक नेपाल भ्रमणमा छन् । उनको सवारीका कारण उपत्यकाको यातायात अस्तव्यस्त छ ।

भीआईपीको सवारीका समय सुरक्षा व्यवस्था मजबुत बनाउन ट्राफिक प्रहरी बाटो बन्द गर्न बाध्य छ । बाटै रोकेर भीआईपीको सवारी गराउँदा सम्बन्धित ठाउँको मात्र नभएर अन्यत्रसमेत लामो समय ट्राफिक जाम हुने गरेको छ ।

ट्राफिक प्रहरीले भीआईपीको सवारीका समय विकल्प खोज्न सर्वसाधारणलाई अनुरोध गर्ने गरेको छ । तर, सरकारले वैकल्पिक बाटो निर्माणमा चासो नदिँदा सर्वसाधारण मारमा पर्ने गरेका छन् ।

चान्सु हाल पाँचतारे होटल सोल्टीमा बसेका छन् । उनको सवारी क्रममा कलंकी, बल्खुलगायत रिङरोडमै सार्वजनिक सवारी साधन रोकिने गरेको छ । मुख्य सडकमा यातायात आवतजावत रोकिँदा वैकल्पिक व्यवस्था नै छैन ।

सरकारले नदी कोरिडोरका सडक विस्तार, मर्मतसम्भारमा चासो नदिँदा वैकल्पिक सडक ओझेलमा छन् । राजधानी दैनिकबाट