काठमाडौं । नक्कली शैक्षिक प्रमाणपत्र बनाएको आरोपमा तीनजना पक्राउ परेका छन् । काठमाडौं महानगरपालिका-९ बत्तिसपुतलीका तीन फोटो स्टुडियो सञ्चालकलाई प्रहरीले सोमबार पक्राउ गरेको हो ।

काठमाडौं उपत्यका अपराध अनुसन्धान कार्यालयका अनुसार मोरङ घर भई गौशाला बस्‍ने एभिआइ फोटो स्टुडियोका चबुरलाल चौधरी, सिन्धुली घर भई बानेश्वर बस्ने एमए जनरल फोटो स्टुडियोकी सुमित्रा कोइराला र आरएन फोटो स्टुडियोकी फुल्हमु तामाङ पक्राउ परेका छन् ।

उनीहरूले स्टुडियोमा एसएलसी, प्लस टु लगायतको शैक्षिक प्रमाणपत्र बनाउने गरेको आरोप छ । उनीहरुले बिशेष गरी ५ सय देखि १ हजार सम्म लिएर खाडी मुलुकमा बैदेशिक रोजगारका लागि जाने व्यक्तिहरुलाई नक्कली शैक्षिक प्रमाण पत्र बनाई दिने गरेको अनुसन्धानबाट खुलेको छ ।

उनीहरुको साथबाट स्टुडियोबाट प्रमाणपत्र, कम्प्युटर, ल्यापटप, फोन बरामद गरिएको उपत्यका अपराध अनुसन्धान कार्यालयका प्रहरी उपरीक्षक (एसपी) कृष्णप्रसाद कोइरालाले जानकारी दिए । लिखत सम्बन्धी कसूरमा थप अनुसन्धान गर्न उनीहरूलाई प्रहरी वृत्त, गौशाला पठाइएको एसपी कोइरालाले बताए ।