काठमाडौं । प्रतिनिधि सभा र प्रदेश सभा निर्वाचनमा सिट बाँडफाँटका लागि सहमति जुटाउन पाँचदलीय गठबन्धनका शीर्ष नेताहरुको बैठक पनि निष्कर्षविहीन टुंगिएको छ ।

बुधबार साँझ सिट बाँडफाँट कार्यदलका सदस्यहरुसहित बसेको बैठक पनि निष्कर्षविहीन टुंगिएको हो । कार्यदलले सिट बाँडफाँटमा सहमति जुटाउन नसकेपछि शीर्ष नेतासहित कार्यदलको बैठक बसेको थियो ।

छलफल सकारात्मक रहेको तर, टुंगो लाग्न भने बाँकी रहेको बैठकमा सहभागी नेताहरुले बताएका छन् । चुनावी तालमेल गर्दा आफूहरुले १०० सिट पाउनुपर्ने दावी नेपाली कांग्रेसले गरेको छ ।

माओवादीले ६०, नेकपा एकीकृत समाजवादीले ४०, जसपाले ३२ र जनमोर्चाले २ सिटको दावी गरेका छन् । बुधबार कार्यदलका सदस्यहरुलाई तयारी अवस्थामा राखेर शीर्ष नेताहरु छलफलमा जुटे पनि कुनै पनि दलले दाबी नछोडेपछि बैठक निष्कर्षविहीन टुंगिएकको हो ।

बिहीबार बिहान ११ बजे बस्ने बैठकले बाँडफाँटबारे टुंगो लगाउने सहमति भएको बताइएको छ ।