काठमाडौं । नेपालले केन्यासँगको पाँच टी-२० क्रिकेट सिरिजअन्तर्गत मंगलबार अन्तिम खेल खेल्दै छ । सोमबार भएको चौथो खेलमा नेपाल ७ रनले पराजित भएसँगै सिरिज २-२ को बराबरीमा पुगेको छ ।

सिरिजमा कब्जा जमाउन मंगलबारको खेल निर्णायक हुनेछ । यी दुई बीचको खेल नेपाली समय अनुसार दिउँसो ३ः४५ बजे सुरु हुनेछ।

पहिलो खेलमा नेपालले केन्यालाई ५ विकेटले हराएको थियो। दोस्रो खेलमा केन्याले पुनरागमन गर्दै नेपाललाई १८ रनले हराएको थियो। यस्तै, तेस्रो खेलमा नेपालले ४ विकेटको जित निकालेको थियो।

सोमबार भएको चौथो खेलमा नेपाललाई केन्याले ७ रनले हराएको थियो । टी-२० सिरिजपछि नेपालले घरेलु टोलीसँग एकदिवसीय सिरिज खेल्नेछ।