काठमाडाैं । लमजुङमा निर्माण भएको दोर्दीखोला जलविद्युत आयोजनाबाट बिजुली उत्पादन सुरु भएको छ ।

हिमालयन पावर पार्टनर लिमिटेडले निर्माण गरेको उक्त आयोजनाले आइतबारदेखि परीक्षण उत्पादन थालेको हाे । योसँगै राष्ट्रिय ग्रीडमा २७ मेगावाट बिजुली थपिएको छ । साेही आयोजनाबाट उत्पादित विद्युत २ सय २० केभी मर्स्याङ्दी कोरिडोर मार्फत मध्यमर्स्याङ्दी विद्युतगृहको सिउँडीबारको ग्रीडमा जोडिएको कम्पनीले जनाएको छ ।

दुई साता परीक्षण उत्पादन गरेपछि ब्यापारिक उत्पादन थाल्ने पनि कम्पनीले जनाएको छ । विद्युत जोडिने दोर्दी कोरिडोरको निर्माण भने नेपाल विद्युत प्राधिकरणले अहिलेसम्सम पूरा गरेको छैन् ।

गैरआवसीय नेपाली संघ (एनआरएनए) ले यस आयोजनामा ३५ दशमलव ७ प्रतिशत लगानी गरेको छ । साथै आइएमई समूहले ३४ दशमल ३ प्रतिशत र सर्वसाधारणको ३० प्रतिशत लगानी रहेको छ ।

सुरुमा रु चार अर्ब २३ करोड लाग्ने अनुमानका साथ आयोजनाले निर्माण थालनी गरे पनि निर्माण अवधि लम्बिँदै गएकाले ४ अर्ब ६४ करोडसम्म खर्च हुनभएको हुनसक्ने आयोजनाको अनुमान छ ।