एजेन्सी । पेरिस सेन्ट जर्मेनले लिग वानमा लिलमाथि शानदार जीत निकालेको छ । किलियान एम्बाप्पेको ह्याट्रिकको मद्दतले जर्मेनले लिलमाथि ७-१ को शानदार जीत हासिल गरेको हो ।

एम्बाप्पेले लियोनेल मेस्सीको पासमा खेल सुरु भएको ८ सेकेन्डमा नै गोल गरेका थिए । मेस्सीले खेलको २७ औँ मिनेटमा अग्रता दोब्बर बनाएर असरफ हाकिमीले तेस्रो गोल थपे ।

पहिलो हाफको अन्त्य र दोस्रो हाफको सुरुवातमा नेयमारले एक-एक गोल गरे । त्यसपछि एम्बाप्पेले दुई गोल थप्दै आफ्नो ह्याट्रिक पुरा गरे ।

तीन खेलबाट ३ वटामै जीत हासिल गर्दै पीएसजी लिगको शीर्ष स्थानमा रहेको छ । लिल भने लिगको १२ औँ स्थानमा सीमित बनेको छ ।