बाँके । बाँकेमा दाउराको चिर्पट प्रहार गरी हत्या गरेको अभियोगमा एकजना पक्राउ परेका छन् । जिल्लाको जानकी गाउँपालिका ६ पिप्रहवाका शिब लोनिया हत्या गरेको आरोपमा सोही ठाउँ बस्ने ५१ वर्षीय सुकलाल लोनिया पक्राउ परेका हुन् ।

कोहलपुर नगरपालिका ७ स्थित रजगरुवा जंगलमा दाउरा काट्न गएको अवस्थामा सुकलाल, भोजु लोनिया र पप्पु लोनियाले शिबलाई दाउराको चिर्पटले प्रहार गर्दा घटनास्थलमै मृत्यु भएको प्रहरीले जनाएको छ ।

ईलाका प्रहरी कार्यालय कोहलपुर र प्रहरी चौकी गनापुरबाट खटिएको प्रहरीले घटनामा संलग्न सुकलाललाई नेपालगंज उपमहानगरपालिका १० चारबाहिनी चोकबाट पक्राउ परेको हो ।

घटनामा संलग्न हाल फरार अन्य २ जनाको खोजी कार्य भइरहेको प्रहरीले जनाएको छ । घटनाबारे प्रहरीले थप अनुसन्धान गरिरहेको छ ।