काठमाडौं । नेपालस्थित भारतीय दूतावासले पनि भारतको ७६ औं स्वतन्त्रता दिवस मनाएको छ । काठमाडौंको लैनचौरमा रहेको भारतीय दूतावासले सोमबार एक समारोहको आयोजना गरी स्वतन्त्रता दिवस मनाएको हो ।

भारतीय झण्डा फहराएर सुरु गरिएको कार्यक्रममा दूतावासका काउन्सिलर प्रशन्न श्रीवास्तवले भारतीय राष्ट्रपति द्रौपदी मुर्मूले राष्ट्रको नाममा दिएको सन्देश पढेर सुनाएका थिए ।

कार्यक्रममा भारतीय सेनामा रहेका मृतकका परिवारलाई समेत सम्मान गरिएको थियो । राजदूतले भारतीय सशस्त्र बलका मृतक गोरखा सैनिकका आफन्तहरुलाई दुई करोड ५५ लाख रुपैयाँ वितरण गरी सम्मान गरेको दूतावासले जनाएको छ ।

त्यस अवसरमा भारतीय स्वतन्त्रता आन्दोलनमा वीरगति प्राप्त गरेकाहरूको सम्मानमा गीत, संगीत प्रस्तुत गरिएको थियो । भारतले सन् १९४७ देखि हरेक वर्ष तत्कालीन ब्रिटिस शासकबाट मुक्ति पाएको दिन अगस्ट १५ लाई स्वतन्त्रता दिवसको रुपमा मनाउँदै आएको छ ।  भारत सरकारको ‘आजादी का अमृत महोत्सव’ स्वतन्त्र भारतको यात्रामा ऐतिहासिक कोसेढुंगा पार गरेको सम्झनामा मार्च २०२१ बाट सुरू गरिएको यो महोत्सव १५ अगस्ट २०२३ सम्म जारी रहनेछ ।