काठमाडौं ।  कतार प्रहरीमा जागिर लगाइदिने भन्दै अल ताक्वेत ओभरसिज नामक म्यानपावर कम्पनीले गैरकानूनी रुपमा प्रतिव्यक्ति १० देखि १५ लाख रुपैयाँसम्म ठगी गरेको सार्वजनिक भएपछि   वैदेशिक रोजगार विभागले छापा मारेको छ । कतार प्रहरीमा भर्ना खुलेको भन्दै विज्ञापन निकाल्ने अल ताक्वेत ओभरसिजमा विभागले छापा मारेको हो ।

विभागका निर्देशक डम्बर बहादुर सुनुवारका अनुसार अल मेनपावरबाट विज्ञापनसम्बन्धी महत्वपूर्ण कागजातहरु नियन्त्रणमा लिइएको हो ।  ओभरसिजको नाममा साउन २५, भदौ १ र २ गते अन्तर्वार्ताको मिति समय तय गरिएको थियो ।

अल मेनपावरले विभिन्न व्यक्तिहरुबाट १५ लाख रुपैयाँसम्म उठाइरहेको भन्ने सूचना आएपछि छापा मारेर महत्वपूर्ण कागजात नियन्त्रणमा लिइएको निर्देशक सुनुवारले बताए । अन्तर्वार्ताको लागि होटल हायातामा हल बुकिङ गरिएको थियो ।

अल ताक्वेत म्यानपावरका सञ्चालक अमित श्रेष्ठले ‘नक्कली विज्ञापन’ प्रकाशित गरेर प्रतिव्यक्ति १० देखि १५ लाखसम्म रकम उठाइरहेका थिए । जबकी सरकारले कतार प्रहरीमा निशुल्क पठाउने निर्णय गरेको थियो । श्रम रोजगार तथा सामाजिक सुरक्षा मन्त्री शेरबहादुर कुँवर यसबारेमा जानकार भएपनि उनले अहिलेसम्म केही बोलेका थिएनन् ।

गत वर्ष अल ताक्वेत ओभरसिजमाथि ठगीको आरोप लागेपछि वैदेशिक रोजगार विभागले कतार प्रहरीको माग नलिने निर्णय गरेको थियो । कतार प्रहरीको आर्थिक चलखेलमा तत्कालिन श्रममन्त्री किसान श्रेष्ठदेखि प्रधानमन्त्री शेरबहादुर देउवापत्नी आरजु राणासम्म मुछिएका थिए । विचौलियाहरुले आरजुका भाइ भुषण राणाको नाम लिएर सेटिङ मिलाएको दावी गर्दै आएका छन् ।

अर्को पनि पढ्नैपर्ने

कतार प्रहरीको नाममा अल ताक्वेत ओभरसिजको ठगी धन्दा, प्रतिव्यक्ति १५ लाखसम्म असुली

स्रोतका अनुसार युवाहरुबाट गैरकानूनी रुपमा उठाएको रकम श्रममन्त्री शेरबहादुर कुँवरसम्म पुर्याएको दाबी गरे पनि मन्त्री निकट स्रोतले भने अस्वीकार गरेको छ ।

गत वर्ष माग नै रद्ध भएपछि यस वर्ष भने रकम बढाएर २ सय युवाबाट ३० करोडसम्म रकम उठाउने योजनासहित श्रेष्ठको समूह लागि परेको स्रोतको दावी छ । श्रेष्ठकै समूहले ठगीको आरोपमा पटक–पटक कारबाहीमा पर्दै आएको शिखर म्यानपावर पनि सञ्चालन गरिरहेको छ ।

श्रेष्ठ चोरीको बिएमडब्लु गाडी खरिद बिक्रीमा पनि मुछिएका थिए।