महोत्तरी । छुरा प्रहार गरेर महोत्तरीको गौशालामा दिनदहाडै पाँच लाख रुपैयाँ लुटपाट भएको छ ।

गौशाला नगरपालिका वडा नम्बर २ बाट रामगोपालपुर नगरपालिका ७ सहसौलाका ३५ वर्षीय अरुण कुमार चौधरीमाथि छुरा प्रहार गरि सो रकम लुटिएको हो ।

शुक्रबार दिउँसो प्र. २-०२-००४ प ३३४७ नम्बरको मोटरसाइकलमा सम्सीतर्फ गइरहेको समयमा चौधरीको बाँया तिघ्रामा छुरा प्रहार गरि घाइते बनाएर अज्ञात व्यक्तिहरूको एक समुहले सो रकम लुटेको इलाका प्रहरी कार्यालय गौशालाले जनाएको छ ।

मोटरसाइकलमा घरतर्फजाने क्रममा एक अपरिचित मोटरसाइकलमा रहेका तीन जनाको अपरिचित समूहले मोटरसाइकलबाट झरेर आफूमाथि चक्कू प्रहार गर्दै पाँच लाख रुपैयाँ लूटेर फरार भएको पीडित चौधरीले प्रहरीसमक्ष बयान दिएका छन ।

छुरा प्रहारबाट घाइते भएका चौधरीको गौशाला पोली क्लिनिकमा उपचार भइरहेको छ । लुटपाटमा संलग्न व्यक्तिको खोजी कार्य भइरहेको प्रहरीले जनाएको छ ।