जनकपुरधाम । जनकपुरमा दिउँसै एक महिलाको साथबाट २ लाख नगद लुटेर भागेका २ जना युवकलाई प्रहरीले पक्राउ गर्न सफल भएका छन् ।

पक्राउ पर्नेमा धनुषाको लक्ष्मीनियाँ गाउँपालिका वडा नम्वर ७ का २७ वर्षीय जितेन्द्र प्रसाद साह र २१ वर्षीय दीपेन्द्र मण्डल रहेको प्रहरीले जनाएको छ । पक्राउ परेका दुवै जनालाई जिल्ला प्रहरी कार्याल्य धनुषाले बिहीबार पत्रकार सम्मेलन गरी सार्वजनिक गरेको हो ।

अनुसन्धानका क्रममा साह र मण्डलले जनकपुरधाम उपमहानगरपालिका वडा नम्वर १ बस्ने शर्मिला यादवले बैंकबाट झिकेर ल्याउँदै गरेको २ लाखसहित उनको मोबाइल, नागरिकता र कागजात भएको झोला लुटेर भागेको थियो ।

साह प्रदेश २–०२–००५प००८५ नम्बरको मोटरसाइकल चलाइरहँदा पछाडि बसेका मण्डलले शर्मिलाको हातबाट झोला लुटेका थिए । पछि दुवै जनाले रकम बाँडफाँट गरेको अनुसंधानको क्रममा देखिएको धनुषाका एसपी वसन्त रजौरेले जानकारी दिए ।

प्रहरीका अनुसार अनुसन्धानका क्रममा साहको घरबाट शर्मिलाको लुटिएको मोवाइल र नगद ५४ हजार तथा मण्डलको घरबाट लुटिएको मध्ये ७८ हजार नगद समेत बरामद भएको प्रहरीले जनाएको छ ।

साउदीमा रहेका श्रीमानले पठाएको रकम बैंकबाट झिकेर घरतर्फ जान लाग्दा मोनास्टिक स्कुल नजिकै एउटा मोटरसाइकलमा आएका दुई जनाले रकम भएको भोला नै शर्मिलाको हातबाट लिएर भागेको थियो । सघनाको सम्बन्धमा थप अनुसन्धान भईरको प्रहरीले जनाएको छ ।