काठमाडौं । लागूऔषध नियन्त्रण ब्यूरोले चार केजी हेरोइनसहित २ जना विदेशी र एक जना नेपाली गरी तीन जनालाई पक्राउ गरेको छ । ब्यूरोबाट गरिएको निरन्तर निगरानीका क्रममा असार ३२ गते उनीहरुलाई नियन्त्रणमा लिइएको ब्यूरोका प्रमुख एसएसपी विकासराज खनालले बताए ।

दक्षिण अफ्रिकाको जोहोनेसवर्गबाटबाट दुबई हुँदै काठमाडौं आएका ए०९८७९५७२ नम्बरको राहदानीबाहाक अफ्रिकन नागरिक ६१ वर्षीय ज्याक्युज एन्टोन एन्जलब्रेच्टलाई ४ किलो हेरोइनसहित ठमेलस्थित एक होटलबाट पक्राउ गरिएकोे ब्यूरोले जनाएको छ ।

अफ्रिकन नागरिक ज्याक्युज एन्टोन एन्जलब्रेच्टको गतिविधिमाथि शंका देखिएकाले उनीमाथि निगरानी गर्दा उनले ल्याएको सुटकेस भित्र फल्सबटम बनाइ ल्याइएको अवस्थामा हेरोइन जस्तो देखिने ४ किलो धुलो पदार्थ बरामद भएको एसएसपी खनालले बताए ।

उक्त लागूऔषध भारत लैजान खोजिएको पनि पुष्टि भएको छ । भारतको दिल्लीबाट उक्त लागूऔषध लिन काठमाडौं आएको बेला भारत मिजोरमम राज्य स्थायी ठेगाना भई जनकपुरी दिल्ली बस्दै आएकी ३२ वर्षीय जोथान्टल्वाङ्गी नाम गरेकी महिला पनि तिलगंगाबाट पक्राउ परेकी थिइन् ।

ब्यूरोले लागूऔषध भारत लैजाने कार्यमा सहयोगगिको भूमिकामा देखिएका नुवाकोट गर्साङ गाउँपालिका–७ स्थायी घर भई हाल बनस्थली बस्ने ट्याक्सी चालक ५० वषीय सुकेश तामालाई पनि ठमेलबाट पक्राउ गरेको छ । प्रहरीले उनलाई बा२ज ५६५५ नम्बरको ट्याक्सीसहित पक्राउ गरेको एसएसपी खनालले बताए ।

पक्राउ परेका तीनै जनालाई लागूऔषध नियन्त्रण ऐन २०३३ बमोजिम लागू औषध हेरोइन मुद्दामा म्याद थप गरी अनुसन्धान भइरहेको ब्यूरो प्रमुख एसएसपी खनालले बताए ।