एजेन्सी । वेस्ट इन्डिजविरुद्धको तीन खेलको एकदिवसीय सिरिजमा बंगलादेशले क्लिन स्विप गरेको छ । घरेलु टोलीविरुद्ध सिरिजको अन्तिम खेलमा ४ विकेटले हराउँदै बंगलादेशले तीन खेलको सिरिज क्लीन स्विप गरेको हो ।

गुयनामा शनिबार राति वेस्ट इन्डिजले दिएको १७९ लक्ष्य पछ्याएको बंगलादेशले ४८ ओभर ३ बलमा ६ विकेट गुमाएर पूरा गर्‍यो । बंगलादेशका लागि लिन्टन दासले अविजित रहदै ५० रनको अर्धशतकीय पारी खेले । त्यस्तै तमिम इकवालले ३४ बनाउँदा नुरुल हुसेन ३२ रनमा अविजित रहे । वेस्ट इन्डिजका गुडाकेश मोटीले चार विकेट लिए ।

त्यस्तै अल्जारी जोसेफ र निकोलस पुरनले समान एकरएक विकेट लिए । यसअघि पहिले ब्याटिङ गरेको वेस्ट इन्डिजले ४८ ओभर ४ बलमा अलआउट हुँदै १७८ रन बनाएको थियो । वेस्ट इन्डिजका लागि कप्तान निकोलस पुरनले ७३ रनको अर्धशतकीय पारी खेले । त्यस्तै किएकी कार्टीले ३३ तथा रोमारियो शेफर्डले १९ रन बनाए ।

बंगलादेशका तैजुल इस्लामले सर्वाधिक पाँच विकेट लिए । त्यस्तै नासुल अहमद र मुस्ताफिजुर रहमानले समान दुई÷दुई विकेट लिए । बंगलादेशले पहिलो खेलमा ६ विकेट र दोस्रो खेलमा ९ विकेटको जित निकालेको थियो । यसपछि बंगलादेशले जिम्बावेसँग टी–ट्वान्टी र एकदिवसीय सिरिज खेल्नेछ ।