कैलाली । सुदूरपश्चिम प्रदेश सरकारले अगामी आर्थिक वर्ष २०७९/८० का लागि ल्याएको बजेट बहुमतले पारित भएको छ । बुधबार बसेको प्रदेशसभाको दोस्रो बैठकबाट बजेट बहुमतले पारित भएको हो ।

बजेट संशोधनको माग गर्दै प्रमुख प्रतिपक्षी एमालेले प्रदेश सभा निरन्तर अवरोध गर्दै आएको थियो । तर, आज सरकारले प्रतिपक्षी दलको १४ बुँदे माग पूरा गर्ने प्रतिवद्धता जनाएपछि भएको सहमतिसँगै बजेट बहुमतबाट पास भएको हो ।

बजेटमाथि आजै छलफल भएको थियो । प्रतिपक्षी दल एमाले र जनता समाजवादी पार्टीका प्रदेशसभा सदस्यहरु बाहेक अन्यले बजेटको पक्षमा मत दिएका छन् ।

एमाले र जसपाका सांसदले भने विपक्षमा मत दिएका थिए। असार १ गते प्रदेश सरकारका आर्थिक मामिला मन्त्री प्रकाशबहादुर रावलले अगामी आर्थिक वर्षका लागि ३६ अर्ब ७४ करोड बराबरको बजेट प्रस्तुत गरेका थिए । बजेटमाथि संशोधन गर्नुपर्ने भन्दै एमालेले अगाडि सारेका १४ बुँदे माग कार्यान्वयन गर्न प्रदेश सरकार तयार भएको छ।