काठमाडौं । दोलखाबाट काठमाडौं आएकी १७ वर्षीया किशोरीलाई टिपरभित्रै बलात्कार गरेको आरोपमा एकजना पक्राउ परेका छन् ।

पक्राउ पर्नेमा दोलखाको गौरीशंकर ८ घर भएका रा १ ख २७३४ नम्बरको टिप्परका चालक ३२ वर्षीय ज्ञानबहादुर नेपाली छन् । काठमाडौंका प्रहरी प्रवक्ता एसपी दिनेशराज मैनालीका अनुसार गत शुक्रबार दोलखाबाट टिपरमा आएकी किशोरीलाई टिपर चालकले थानकोट पुर्याएर राति करिव १० बजे टिपरभित्रै बलात्कार गरेका हुन् ।

किशोरी काठमाडौंको गौशालामा बसेर बढ्दै काम पनि गर्छिन्। उनलाई टिपरमा तेल सकियो भन्दै थानकोट डिपो नजिकै पुर्याएर बलात्कार गरेको प्रहरीले जनाएको छ ।

सहचालकलाई बाहिर पठाएर टिपरको ढोका बन्द गरेको र आफूलाई बलात्कार गरेको किशोरीको जाहेरीमा उल्लेख छ । थानकोट वृत्तले पीडित बालिकालाई उद्धार गरी स्वास्थ्य परीक्षण तथा उपचारका लागि प्रसुती गृह अस्पताल थापाथली लगेको थियो ।

बलात्कारपछि फरार भएका चालकलाई कलंकीबाट पक्राउ गरिएको प्रहरीले जनाएको छ । उनलाई ५ दिन थुनामा राखेर अनुसन्धान गर्न सोमबार जिल्ला अदालतले अनुमति दिएको छ । उनीमाथि प्रहरी वृत्त थानकोटले थप अनुसन्धान गरिरहेको बताइएको छ ।