तुलसीपुर । न्याय परिषद्ले उच्च अदालत तुलसीपुरको बुटवल इजलासकी न्यायाधीश रेणु साहलाई योग्यता नपुगेको भन्दै पदबाट बर्खास्त गरेको छ ।

न्यायाधीश नियुक्त हुनका लागि आवश्यक योग्यता नपुगेको (ढाँटेको) अभियोगमा न्यायपरिषद् सचिवालयको सिफारिशमा कायम मुकायम प्रधानन्यायाधीश दीपककुमार कार्कीले साहलाई बर्खास्त गरेका हुन् ।

उच्च अदालतमा नियुक्त हुन १० वर्ष निरन्तर कानुन व्यवसायमा रहेको हुनुपर्ने प्रावधान भए पनि सीटीईभीटीमा कार्यरत साहलाई न्यायाधीश बनाइएको थियो । उनको अयोग्यतमाथि प्रश्न उठेपछि परिषद्ले छानबिन गरेर अयोग्यता ठहर गरेको हो ।

न्यायपरिषद्ले सिफारिश गरेकै दिन कामु प्रधानन्यायाधीश कार्कीले साहलाई बर्खास्त गरेका हुन् । २०७५ चैत २० गते न्यायाधीश नियुक्त भएकी साह पूर्व प्रधानन्यायाधीश रामकुमार प्रसाद साहकी छोरी समेत हुन् ।