काठमाडौं । नेपाल प्रहरी श्रीमती संघकी अध्यक्ष कुसुमलता सिंहले यौन हिंसा गरेर कोही फुत्किन नसक्ने बताएकी छन् ।

बुधबार संघले आयोजना गरेको ‘यौन दुव्र्यवहार विरुद्ध जनचेतना अभियान’ कार्यक्रममा बोल्दै उनले सो कुरा बताएकी हुन् ।

कार्यक्रममा बोल्दै उनले क्षणिक आवेगले जीवनभर जेल पुर्याउने भन्दै पीडकलाई सचेत हुन आग्रह गरेकी गरिन् ।

उनले भनिन्, ‘हिंसामा संलग्न हुनेहरुले फुत्किहाल्छौ भन्ने भ्रम नपाल्दा हुन्छ ।’ पीडितलाई नै औँला उठाउने समाज छ तर पीडकलाई सामाजिक बहिष्कार नगर्दासम्म यौन हिंसा न्युनिकरण नहुने पनि उनले तर्क गरिन् ।

यौन हिंसा पीडित नभई अब पीडक सुध्रनुपर्ने उनको भनाइ थियो ।उनले समाजमा शिक्षित मानिसहरुबाट पनि यस्ताखाले हिंसा भएका हुँदा अब सचेत हुने पालो पीडकको रहेको बताइन् ।

यस अभियान मार्फत आफूहरुले क्षणिक हिंसामा जाँदा आफ्नै पनि जीवन बर्बाद हुन्छ भनेर सचेत गराउन खोजिएको उनको भनाई थियो ।