काठमाडौँ । नेपाली कांग्रेसमा भ्रातृ संस्थाको विधान र नयाँ शुभेच्छुक संस्थाहरूलाई आबद्धताको अनुमति दिने विषयमा छलफल सुरू भएको छ ।

केन्द्रीय कार्यसमितिका पदाधिकारीहरूले मंगलबार त्यसबारे छलफल थालेका छन् ।

उपसभापति पूर्णबहादुर खड्काले मंगलबार भ्रातृ संस्थाको विधान र नयाँ शुभेच्छुक संस्थाहरू थप गर्ने विषयमा छलफल गर्न पदाधिकारी बैठक राखेका थिए ।

सभापति एवम् प्रधानमन्त्री देउवा भने कार्यव्यस्तता देखाएर पदाधिकारी बैठकमा सहभागी भएनन् ।

बैठकमा भ्रातृ संस्थाहरूको विधानलाई अन्तिम रुप दिने र नयाँ शुभेच्छुक संस्थाहरूलाई आबद्धताको अनुमति प्रदान गर्ने विषयमा छलफल भएको सहमहामन्त्री जीवन परियारले जानकारी दिए ।

प्रवक्ता प्रकाशशरण महतले भ्रातृ संस्थाको विधान र शुभेच्छुक संस्थालाई अनुमति दिनेबारे छलफल सुरु भएको बताए ।