काठमाडौं । नेकपा एमालेकी सांसद विन्दा पाण्डेले महिलाको क्षमता भन्दा पनि रुप हेरेर जागिर दिने गरेको बताएकी छन् ।

बुधबार प्रतिनिधिसभा अन्तर्गतको कानुन न्याय तथा मानव अधिकार समितको बैठकमा बोल्दै उनले क्षमताभन्दा पनि रुप हेरेर जागिर दिने भएकाले एसिड पीडितले जागिर पाउने सम्भावना कम भएको बताएकी हुन् ।

उनले भनिन्,‘एसिडबाट जलेका वा जलाएकाहरु शारिरिक रुपमा केही परिवर्तन देखिन्छन् । तर उनीहरु मानसिक रुपमा अरु जत्तिकै सक्षम हुन्छन् तर रोजगार दिने सवालमा क्षमता हेरिँदैन ।’

एसिड पीडितलाई शिक्षा, स्वास्थ्य उपचार र रोजगार सुनिश्चित गर्नुपर्ने उनले बताइन् । एसिड पीडितको आर्थिक अभावमा तत्काल उपचार हुन नसकेको भन्दै उनले त्यसलाई सम्बोधन गर्न ध्यानाकर्षण गराइन् ।